Alfaneiro xaponés do Parque Luis Pasín

Descrición

Arboriña perennifolia que soe medir de 4 a 8 metros de altura, de copa frondosa que proporciona abondosa sombra e tronco de cortiza lisa e gris, que vai agretando coa idade.

Follas simples, coriáceas, alongadas e case elípticas, de cor verde escuro brillante na face e máis pálidas no envés. Rematadas nunha punta alongada ou gotexador, que representa unha adaptación á alta humidade, facendo que a auga escorra e pingue por elas e evitando o enchoupamento das follas. Esta é a especie de alfaneiro coas follas máis grandes (8-12 centímetros), se o comparamos cos alfaneiros de folla oval (Ligustrum ovafolium) e ligustros (Ligustrum vulgare) de folla máis pequena.

As flores aparecen a partir de maio de forma moi vistosa. Son brancas e moi recendentes, que aparecen agrupadas en grandes ramalletes terminais chamados panículas multifloras. No verán cobren ricamente as pólas creando un estético efecto.

Os froitos son bagas globosas de cor negra, de 1 centímetro de lonxitude e que conteñen de 1 a 3 sementes. Maduran en outono mais permanecen moito tempo na árbore, polo que constitúen un bo alimento no inverno para os paxaros, aínda que non para as persoas, pois son tóxicos. Non existe, non obstante, un alto risco de envelenamento accidental, pois é tan amargo o seu sabor que non adoita pasarse da primeira dentada.