As Dúas Marías

Historia

Maruxa e Coralia Fandiño Ricart eran costureiras e tiñan o seu obradoiro na rúa do Espírito Santo. A súa actitude irreverente e o gusto polas cores foron un xeito de resistir e erguer a voz contra o réxime franquista, que pagara con elas a disidencia dos seus irmáns.

En efecto, nos tempos posteriores ao Golpe de Estado de 1936 a Garda Civil buscou tres dos seus irmáns para detelos (Manuel, Afonso e Antonio) pois eran sinalados militantes do movemento anarquista na cidade. Manuel conseguiu agocharse na casa familiar da rúa da Carricova e alí estivo até que pasou á clandestinidade; comezou entón o sufrimento de Maruxa e Coralia, pois foron acosadas e aldraxadas para forzar a entrega do irmán.

Os seus paseos e o seu aspecto foron un exemplo de resistencia e resiliencia e por iso foron moi queridas pola veciñanza da cidade. A que leva o paraugas é Coralia e a baixiña, Maruxa.