Cafetería do Parque Eugenio Granell

Historia

A interacción social é o contacto significativo que as persoas teñen entre si. Existen diferentes tipos de espazos que poden ser bos lugares para a interacción, algúns dos máis comúns son as prazas e parques públicos, principais puntos de reunión para a poboación. Xa na Grecia Clásica, por exemplo, empregábase o ágora para socializar, do mesmo xeito que no foro romano.

Estes espazos serven como centro de actividade municipal e como lugares de encontro para os veciños. Permiten que as persoas se deteñan a conversar sen o ruído e outras distraccións que provoca o tráfico, e con frecuencia albergan a artistas de rúa, festivais e outros eventos que promoven a interacción social, co que se converten en salas de estar ao aire libre.

A introdución do máximo grao de prestacións posibles nos xardíns responde ás demandas de espazos lúdico-recreativos e saudables necesarios para unha poboación urbana masificada e sometida á crecente contaminación atmosférica derivada da actividade industrial. As cafeterías, bares ou churrerías dos parques ofrecen fervenzas artificiais que absorben o ruído das rúas dos arredores e espazos de tranquilidade no medio da présa dunha cidade.

Os establecementos que serven comidas e bebidas tamén teñen o efecto de atraer ás persoas, xa que comer e beber en compañía sempre foi unha actividade de formación de comunidades. Este efecto acentúase cando están situados en áreas agradables, onde poder instalar mesas fóra cando o clima é bo.

Os locais de hostalería situados dentro dos espazos verdes deberán ter un deseño acorde coa paisaxe e a historia de cada parque no que sexan emprazados, para respectar a súa identidade e reducir o impacto ambiental. Nas superficies descubertas onde se localicen as mesas e cadeiras, ou se realicen outras actividades que requiran a construción dunha base, o piso deberase materializar mediante alternativas que admitan a absorción de parte da auga de choiva, como bloques articulados de formigón para céspede ou pisos de madeira con xunta aberta.