Parroquia
Conxo
Tipoloxía
Castelo
Cronoloxía
Séculos XII-XV
Autor
Xoán Arias
Historia
Tamén coñecido como Castelo dos Churruchaos é o castelo medieval máis emblemático da mitra compostelá. O castelo funcionaba como punto de control do camiño cara ao mar e como primeiro posto de defensa ante previsibles invasións que puideran entrar na cidade, a través da ría de Arousa e o río Ulla.
Ademais do seu valor defensivo, era un enclave perfecto para controlar a entrada e saída da cidade de xentes e mercadorías, xa que se atopa nas proximidades do antigo camiño que unía Santiago con Noia e co camiño de Padrón, ao Camiño Portugués, que seguían os peregrinos a Santiago dende o sur de Galicia. Este foi o motivo principal de que o castelo, ao contrario do habitual, se colocara ao carón do río, no fondo dun val, e non nunha posición predominante en altura (posición dos denominados castelos rochosos).
Descrición
No ano 1255 aparece a primeira mención documental en relación coas constitucións capitulares de Xoán Arias (que debeu de ser o seu construtor), rexistrándose a reconstrución realizada por Berenguel de Landoira despois dos estragos causados polos cidadáns de Compostela a fins do século XIV, no que foi o primeiro enfrontamento entre o concello e o bispado, estando á fronte da sublevación Alfonso Suárez de Deza, no 1320. No ano 1466 destrúese con ocasión da revolta irmandiña que estivera precedida no 1458 polo asalto ao castelo por parte da irmandade en Santiago axudada polo Conde de Trastámara.
Trátase dun xacemento arqueolóxico cunha adscrición cronolóxica definida pois entre o século XIII e XV (época da súa destrución), desenvolvido en grande amplitude (3.600 metros cadrados). Conformada por distintas cercas, a exterior conservada nunha lonxitude de 40 metros na área sueste, a interior conservada en todo o perímetro, e outras estruturas na zona central onde se podería emprazar a torre da homenaxe, así como os restos dos torreón nos seus ángulos e flanqueando o acceso principal (malia que só se conservan os seus basamentos). Conta ademais con dependencias subterráneas en relación coas que até de agora só foron documentados os accesos escalonados.
.jpg)
.jpg)