Parroquia
Figueiras
Tipoloxía
Centro de interpretación
Historia
A antiga escola unitaria da Portela de Figueiras era unha das moitas existentes no rural galego hai varias décadas, reflexando a vida propia nas unidades de poboación das parroquias, que entón eran as máis importantes social e administrativamente.
Estas parroquias foron, pouco a pouco, sendo despoxadas da súa organización e estrutura, cando os mestres deixaron de vivir na mesma parroquia, os curas escasearon, e as escolas pasaron a ser grupos escolares xeralmente na capitalidade do concello para optimizar os recursos e estruturar a formación dos alumnos. Os habitantes do rural emigraron aos pobos veciños, á capital da provincia, ás zonas máis desenvolvidas do Estado ou ao estranxeiro, co consecuente despoboamento do rural.
Mantivéronse determinadas escolas unitarias, ben para educación preescolar, ben porque a entidade do núcleo permitía ou esixía esa individualidade, mais foron desaparecendo pola diminución da matrícula ao reducirse a poboación.
Destacar que as escolas unitarias deron a oportunidade de alfabetizar a todo o mundo na mesma parroquia de residencia, quedando na memoria de moitas xeracións educadas neste modelo propio da educación galega.
Descrición
O Centro de Interpretación do Medio Rural da Portela, ubicado no que foi a escola unitaria de Portela, na parroquia de Figueiras, crease co obxectivo de promover a conciencia de interrelación que se dá entre as actividades humanas e o territorio. Este equipamento municipal constitúe un recurso importante para coñecer aspectos sobre o medio rural, a conservación da contorna e o uso sostible dos recursos.
Preténdese que os máis cativos poidan coñecer e gozar do medio rural, a súa xente e as tradicións que se foron perdendo co progresivo crecemento das urbes. Mais non só os rapaces poden gozar do centro, senón que tamén os veciños poden compartir os seus coñecementos e anécdotas cos máis novos e ensinarlles os segredos da natureza que a súa experiencia lles deu.
Os obxectivos cos que naceu o Centro de Interpretación do Medio Rural da Portela, son os que se expoñen a continuación:
- Concienciar aos nenos da importancia do mantemento do Medio Rural.
- Saber gozar do entorno e da natureza.
- Educar en valores medioambientais.
- Contribuír coa entorna para mellorala.
- Sensibilizar na importancia da reciclaxe, a reutilización e a diminución de residuos.
- Desenvolver as capacidades de creación e expresión artísticas.
- Potenciar a imaxinación dos rapaces.
- Divertir aos nenos mentres aprenden as nosas tradicións.
- Concienciar na importancia de manter as nosas raíces galegas.
- Facilitar aos nenos a posibilidade de experimentar vivencias distintas.
.jpg)
.jpg)