Circuíto biosaudable da Praza de Vigo

Descrición

O proxecto de reforma emprendido en 2013 para a mellora da Praza de Vigo incluía a implantación dun circuíto biosaudable neste espazo que, xunto co parque infantil, o novo axardinamento e a renovación da iluminación e o mobiliario urbano, buscaban humanizar o espazo creando un área que permitise o lecer de nenos e adultos nunha zona próxima ás súas residencias.

Este circuíto biosaudable está situada nun lateral do parque, ao carón do parque infantil, e conta con varias máquinas na que exercitarse destinadas aos adultos. Este uso ximnástico combínase co de zona de lecer proporcionado polo mobiliario urbano da zona, que crea un área de descanso destinada á socialización co público infantil que acude ao parque e coas persoas adultas que os acompañan, creando un espazo de uso multixeracional dentro da Praza de Vigo.

Este circuíto biosaudable conta con catro elementos axeitados para a saúde integral e acondicionamento físico das persoas que fagan uso de él. Os aparellos están acompañados de carteis informativos sobre o circuíto e sobre o uso e as particularidades de cada elemento. Estes son os seguintes:

- Cintura: aparato no que poder xirar o corpo cara os lados sobre pequenas plataformas circulares, mellorando a flexibilidade e o equilibrio.

- Esquí de fondo: máquina na que poder facer movementos cos brazos e pernas similares aos realizados ao camiñar.

- Bicicleta estática: permite pedalear nun elemento similar a unha bicicleta, centrando o exercicio na axilidade e forza das pernas.

- Surf: unhas plataformas permiten realizar desprazamentos laterais cos que mellorar a elasticidade e o equilibrio, sen apenas ter que facer forza co que se evitan posibles lesións.

O aumento da esperanza de vida e o envellecemento da poboación, xeraron un cambio demográfico importante, sendo un dos principais fenómenos sociais do século XXI. A cantidade de anos vividos están estreitamente vinculados co estado do noso organismo, e algúns hábitos como o sedentarismo, tabaquismo ou tensión, poden acelerar o noso proceso de envellecemento, mentres que a práctica de exercicio corporal continuo contribúen a retrasalo.

A realización habitual de actividades físicas non só é recomendable para reducir as posibilidades de sufrir problemas cardiovasculares, hipertensión, colesterol, osteoporose ou diabetes; senón que ademais ofrece unha gran posibilidade de socialización con outras persoas, sobre todo se as prácticas deportivas están desempeñadas en parques públicos.

Levar a cabo programas de exercicio físico de forma habitual con exercicios aeróbicos, de flexibilidade, de resistencia ou de equilibrio; é clave para asegurarnos que a persoa poderá seguir realizando todas as actividades diarias con satisfacción, conservando desta forma a súa autonomía.

Diversos estudos mostran que a existencia de espazos específicos para practicar estes exercicios é clave para motivar positivamente aos maiores e persoas de todas as idades, para realizar estes programas físicos regularmente. Por iso, o Concello de Santiago de Compostela estableceu un programa que pretende dotar a diferentes zonas verdes do municipio de aparatos de exercicios biosaudables para o uso e goce de toda a poboación interesada.

O crecente interese nas actividades deportivas ao aire libre, con especial consideración ao ocio e o entretemento, motivan polo tanto o establecemento deste conxunto de accesorios de ximnasia para uso público nos parques e xardíns da cidade de Compostela. A súa localización nestas zonas verdes saca proveito da contorna vexetal para o acondicionamento físico ao aire libre, combinando a práctica deportiva, exercicios de rehabilitación e mantemento da saúde, co lecer nunha contorna saudable.

Os elementos seleccionados están especialmente deseñados para o exercicio cardiovascular de baixa intensidade, especialmente indicado para persoas maiores. Os equipos contan con instrucións moi sinxelas para realizar os exercicios de forma óptima, presentando información acerca dos beneficios de realizar tal exercicio ou as zonas do corpo que traballan.

En xeral, o uso destes aparatos ten as seguintes vantaxes:

- Desenvolve e fortalece a musculatura.

- Mellora a axilidade e flexibilidade das articulacións.

- Restablece a coordinación psicomotora, a mobilidade e o equilibrio.

- Aumenta a capacidade cardio-pulmonar.

- Mellora a circulación e o sistema nervioso.

- Logra a interacción social entre os usuarios dos aparatos.

Os circuítos biosaudables constitúen puntos de encontro, diversión e interacción entre persoas de distintos grupos de idade, o que aumenta a motivación por parte dos individuos para participar activamente no mantemento das súas funcións motoras.

A idea dos parques de exercicios orientados especificamente para a ximnasia suave ao aire libre foi importada da China, unha sociedade que demostra un envexable respecto e admiración polas persoas maiores e onde a práctica de deporte ao aire libre é un hábito bastante estendido. A nivel europeo, os Dynamic Garden, parques xeriátricos ou circuítos biosaudables, comezaron a comezos do 2005 en Finlandia, co obxectivo de promover e motivar ás persoas maiores a facer exercicio, comunicarse e divertirse en contornas naturais.