Cruceiro do Gaio da Alameda

Historia

Este emprazamento é relativamente recente (século XIX), froito das modificacións da contorna do Carme-Bar-San Lourenzo no século XIX. Antes estaba preto da ponte do Arcebispo e situábase no alto dunha escalinata, o que lle confería unha certa teatralidade. Foi obxecto de fonda devoción popular que o adornaba con flores, ofrendaba exvotos e espigas e mantiña acendido o farol que o alumaba día e noite, mesmo tiña unha festa anual.

Este é un dos moitos cruceiros barrocos que hai na cidade; predominan sobre todo no que antes foron arrabaldes pois eran moi frecuentes nas encrucilladas. Pola contra, no rural agromaron nos séculos XIX e XX, cando a mellora do nivel de vida permitiu estes investimentos.

A historia dos cruceiros galegos está inevitablemente unida á figura de Castelao, que investigou e estudou estes elementos da nosa tradición.