Escultura á entrada da Granxa do Xesto

Historia

Un dos poemas recollidos en Cantares Gallegos de Rosalía de Castro completa a benvida ao parque, xa que aparece na inscrición da pedra:

Fun un domingo, fun pola tarde, co sol que baixa tras dos pinares, cas nubes brancas sombra dos ánxeles, cas palomiñas que as alas baten con un batido manso e suave, atravesando vagos celaxes, mundos extraños que en raios parten ricos tesouros de ouro e diamante. Pasín os montes, montes e valles; pasín llanuras e soledades; pasín os regos, pasín os mares cos pés enxoitos e sin cansarme. Rosalía de Castro.

Esta cantiga é unha glosa da muiñeira popular ...fun á taberna do meu compadre, fun polo vento, vin polo aire. Aparece recollida na obra Cantares Gallegos de Rosalía de Castro, publicada en 1863 e coa que se inicia o Rexurdimento da Literatura Galega. Cen anos despois, esta data será elixida para conmemorar o Día das Letras Galegas. Neste mesmo ano tamén tivo lugar a entrada en vigor da Proclamación de Emancipación que abole a escravitude no terreo confederado dos Estados Unidos durante a súa Guerra de Secesión e fúndase a Cruz Vermella Internacional.

A importancia de Cantares Gallegos excede o ámbito literario, pois incide no aspecto de rehabilitación da cultura galega. A obra consta de 36 poemas, que son glosas de cantares populares que describen tradicións e costumes galegas, a paisaxe, os amores, a emigración... Predominan os modelos métricos tradicionais, con versos de arte menor e rima asonante.