Escultura Proa a Enciño da Almáciga

Historia

Silverio Rivas Alonso naceu en Ponteareas (Pontevedra) en 1942. Comezou a traballar no taller de ebanistería do pai aos doce anos. Iniciou os seus estudos na Escola de Artes e Oficios de Vigo, para posteriormente continualos en Madrid. Tamén se formou en Sargadelos, feito este que o levou a innovar con conxuntos articulados e desmontables de cerámica.

A súa carreira artística comeza a despegar en 1970, cando acude á Bienal de Pontevedra. En 1971 realiza a súa primeira exposición individual na Sala de Exposicións da Caixa de Aforros de Vigo. As súas obras son expostas en Francia, Bélxica, Holanda, Reino Unido e Alemaña, participando tamén en importantes exposicións colectivas.

Pioneiro da abstracción escultórica en Galicia, Silveiro Rivas traballa indistintamente a pedra, a madeira e o bronce, aínda que é con este último co que mellor se expresa. Ten o seu obradoiro en San Xoán de Paramos, no concello pontevedrés de Tui.

En 1990 realiza unha obra de grandes dimensións para a Praza de América en Vigo, chamada a Porta do Atlántico. Este monumento esculpido en granito rosa do Porriño está situado no medio da praza, sobre un gran estanque circular de 38 metros de diámetro. O artista trata de render unha homenaxe ao Océano Atlántico e a América, mais tamén aos miles de emigrantes que utilizaron durante moitos anos o porto vigués como lugar de partida para buscar fortuna alén do mar.

A obra de Silverio Rivas conta con moitos monumentos situados en diversos espazos públicos. Nos parques e xardíns de Santiago de Compostela podemos atopar diferentes obras do escultor. Ademais de Proa a Enciño no Parque do Monte da Almáciga, a carón da entrada do CGAC (Centro Galego de Arte Contemporáneo) emprázase a escultura en granito negro A Pía, e na avenida do Burgo das Nacións está o Dolmen Novo Milenio, obra inaugurada no marco das celebracións da Capital Europea da Cultura do ano 2000.