Eucalipto do Paseo da Ferradura da Alameda (Eucalipto dos Namorados)

Características

Polo seu emprazamento e polo banco que o rodea, esta árbore foi alcumada o Eucalipto dos Namorados. Conta a tradición que para casar hai que dar unha volta ao banco e non hai dúbida -á vista das inscricións do tronco- que é espazo preferido para confidencias.

Esta árbore centenaria é un Eucalyptus globulus; ten unha altura próxima aos 40 metros e un perímetro medio de 5 m no tronco e 26 na copa. Pola súa situación, antigüidade e porte está considerada como unha das árbores senlleiras de Galicia ((código 45A); por iso está catalogada e conta con pautas de conservación específicas.

No século XIX -cando as viaxes oceánicas comezaron a ser máis rápidas- as especies vexetais exóticas entraron en Europa dun xeito máis doado. Os xardíns e parques urbanos foron o destino de moitas destas variedades que se elixían e plantaban para embelecer estes espazos de sociabilidade e lecer. En Santiago, a Real Sociedade Económica de Amigos do País foi a gran dinamizadora desta práctica, instalando na Alameda árbores e sementes que chegaban á cidade.

Unha destas plantas exóticas foi o Eucalipto, sendo a Alameda un dos lugares onde atoparon fogar as sementes de eucalipto que enviou a Galicia frei Rosendo Salvado, orixinario de Tui, bispo de Nova Nursia (Australia). Era unha especie moi interesante polas propiedades medicinais das súas follas, tal e como o propio bispo contaba, e por mor delas e polo seu valor ornamental foi cultivada en Galicia esporadicamente até mediados do século XX; é daquela cando se reintroduce como especie madeireira nos espazos forestais.

Aínda que hai moita discusión, a documentación proba o envío feito dunhas sementes á cidade de Santiago e a plantación dalgunhas delas na Alameda por iniciativa da Real Sociedade. Di a tradición que este exemplar naceu dunha daquelas sementes, aínda que todo apunta a que as primeiras sementes de Salvado eran posiblemente Eucalyptus marginata (alcumada como a caoba de Perth); pero é certo que o bispo puido traer outras variedades en calquera das súas viaxes a Galicia. En todo caso esta é hoxe unha árbore centenaria e está acompañada doutras -tamén antigas- que hai ao longo deste mesmo paseo. A esta os expertos calcúlanlle unha antigüidade de 120-140 anos.