Fonte da Carballeira de Vista Alegre

Historia

Fronte a moitas outras fontes da cidade, destinadas ao abastecemento de auga dos cidadáns, esta responde máis a unha función decorativa do espazo público. A orixe das fontes de uso ornamental procede da Idade Media, cando a cultura islámica as introduciu dentro de edificios privados e zonas públicas, combinando tanto a utilidade coma a beleza da auga en movemento. Estas fontes situadas en pazos, patios, xardíns, prazas ou mesquitas, servían como subministración da auga, para refrescar o ambiente, aclimatar os espazos ou para o gozo sensorial.

Os xardíns urbanos ofrecen espazos de ocio e supoñen un achegamento entre os cidadáns urbanos e a natureza que se desvincularon do seu ámbito urbano. As fontes, que hoxe consideramos inherentes a estes espazos, chegaron coa subministración estable de auga, logrando un protagonismo destacado polos seus valores ornamentais e paisaxísticos, tanto que hoxe non concibimos os nosos parques e prazas sen elas.

A auga que mana desta fonte provén, como no caso doutras moitas fontes da cidade que non posúen manancial directo, da traída municipal de auga, polo que é potable. O espazo que rodea a esta fonte é moi tranquilo, case escondido entre a vexetación que, combinada co encanto da auga, fan deste un fermoso lugar de descanso e recreo dos sentidos.