Fonte da Cuncha da Alameda

Historia

Esta peza nacida para o miradoiro do paseo dos Leóns, chegou aquí en tempos relativamente recentes. Naquel emprazamento e con esta feitura seguramente realzaba o carácter rústico e bucólico da vista desde aquel lugar; nesta nova posición contribúe notablemente a calmar o espazo e a melloralo con xogos de luz e sons diferentes. Esta capacidade de crear ambientes é unha das calidades máis sinaladas dos espazos dotados con fontes, por iso a auga está presente nos xardíns máis antigos. Neste parque contribúen notablemente a enriquecer a experiencia da visita ou do paseo.

Esta fonte, chamada da Cuncha, ten aparencia de cunca ou media laranxa e lembra a forma das pías da antiga fonte do Paraíso, que era unha estrutura monumental situada na praza ao norte da Catedral (Acibecharía ou do Paraíso) e que sinalaba, en certo modo, a fin do camiño de peregrinación. No claustro catedralicio está hoxe un daqueles píos e o parecido é evidente.