Fonte de Mazarelos

Historia

Esta pequena fonte está realizada en pedra e atópase situada contra o muro da Igrexa da Universidade ou da Compañía, un templo barroco construído polos xesuítas no século XVII. Segue a tipoloxía das fontes de frontón, composta dun corpo vertical realizado en pedra de cachotaría, complementado con perpiaños na parte central e na superior, formando unha especie de frontón triangular que coroa o conxunto. No centro do pano vertical colócase a saída da auga, nun único picho que verte o líquido cara unha pequena pía rectangular, formada por laxas de xisto e na que se sitúa a arqueta.