Fonte do Lavadoiro de Bonaval

Historia

Esta fonte está vinculada á gran abundancia de auga subterránea presente no parque, o que fai necesaria a súa xestión e canalización. A auga presente nos xardíns nace dun manancial situado na carballeira, na parte alta dos terreos ocupados polo Parque de San Domingos de Bonaval, e vai sendo conducida a través dun percorrido descendente formado por diversas fontes para salvar o desnivel e chegar ao depósito de auga aloxado baixo o Xardín dos Frades e dende onde ten lugar a rega do parque.

Esta fonte segue a tipoloxía da fontes de cano, que se basean nun simple muro de pedra cun ou dous canos por onde sae a auga. Este muro de pedra pecha a saída da auga do manancial, permitindo canalizar a auga a través dun cano polo que se lle dá saída ao exterior. Soen estar construídas con pedra de cantería e poden contar con inscricións ou estar adornadas con cruces de pedra, imaxes de santos ou figuras de animais, que fan referencia á cristianización das fontes.