Homenaxe a Carlos Maside

Historia

Vinculado ás vangardas culturais galegas dos anos 20 e 30 do século XX, Carlos Maside abriu estudio en Santiago en 1932 e mantivo unha fonda relación coa cidade durante toda a súa vida, reflectindo na súa obra mil e unha estampas e persoeiros daquela Compostela. Foi dinamizador e integrante de todo tipo de iniciativas artísticas, culturais e mesmo políticas e por iso foi represaliado tras o golpe de estado de 1936. Viviu a partir de entón en Santiago nunha sorte de exilio interior que dificultou tanto a súa vida profesional como artística; con todo mantivo abertas as canles de comunicación coa Galicia do exilio exterior (sobre todo con Luís Seoane) e serviu de ponte cos intelectuais das novas xeracións, como Uxío Novoneyra, Manuel María, Ventura Cores ou o seu sobriño, Xulio Maside. Esta obra e a súa emprazamento nun espazo tan sinalado como é a Alameda honra a valiosa achega deste intelectual á cidade e a Galicia.

Soledad Penalta é unha artista recoñecida pola súa obra en aceiro ou ferro, como é o caso. Usa estes materiais esculpindo o propio espazo baleiro, arrancando del as formas que recoñecemos e dotándoas de certa monumentalidade e dun dinamismo que vén dado por eses xogos e contrastes entre o sólido e o baleiro. Hai varias pezas súas nos parques da cidade sendo especialmente popular a súa intervención para a recuperación do antigo cruceiro de Conxo, hoxe na confluencia das rúas de Sánchez Freire e de García Prieto.

NA MORTE DE CARLOS MASIDE

PODE morrer o home?

Dónde está agora Compostela?

Eu non sei pensarte morto.
Abrio a fiestra
                            e ollo a serra par ti . . .

1958.

Uxío Novoneyra