Mina de auga da Selva Negra

Historia

Unha mina de auga consiste nunha escavación na rocha na que aflora a auga para o seu mellor aproveitamento. Supoñen o acondicionamento do punto de afloramento das correntes subterráneas de auga, e ademais de sanear a zona para evitar contaminacións do recurso, poden servir para facilitar a canalización cara unha fonte ou condución.

Na tempada de chuvias, as escorrentas superficiais convértense nun auténtico manto de auga, dadas as condicións de fortes pendentes e substrato pétreo das ladeiras do Monte Pedroso. Esta abundancia de auga, tanto superficial como subterránea, fai necesaria a súa xestión e canalización. Para evitar a forte erosión producida pola escorrenta, condúcese a través de diversos percorridos descendentes cara ás lagoas e fontes situadas na parte baixa da Granxa do Xesto e da Selva Negra, para despois continuar o seu percorrido a través de canalizacións e regatos que verten as súas augas no río Sarela.

Os medios húmidos que forman estas minas de auga son esenciais para a formación do hábitat de diversas especies animais e vexetais, entre elas a salamántiga (Salamandra salamandra), un anfibio ameazado que só cría neste tipo de hábitats, ademais de insectos coma o gaiteiro aliazul (Calopteryx virgo) ou algunhas avelaíñas nocturnas de fermosas cores.

Destaca a utilidade das minas para albergar morcegos, que buscan nelas a tranquilidade necesaria que atopan en poucos lugares onde poder facer o seu refuxio. Estes animais son moi beneficiosos para o home, polo que as minas non se deben frecuentar para non molestalos, ademais dos perigos de derrubamentos que poden ter algunhas delas.