Miradoiro do Paseo dos Leóns da Alameda

Historia

O paseo dos Leóns é a zona máis antiga do paseo da Ferradura e como todo o itinerario naceu a partir dun proxecto deseñado en 1835 que tardaría en concretarse. Nesta parte as obras recibiron un pulo importante na década de 1850, cando por mor da crise económica e social, a cidade promoveu este proxecto como xeito de empregar as moitas persoas que quedaron sen traballo ou que emigraran á cidade no malfadado ano da fame (1853).

Daquela esta contorna recibiu o nome de paseo da Boa Vista, que sería substituído polo actual en 1883 cando foi instalada aquí a entrada monumental -cos seus leóns- que daba paso ao paseo Central. En 1918 adquirirá a súa configuración actual ao ordenarse e realiñarse a caída do outeiro cara ao Pombal e a estrada de Santa Comba.