Monumento a Ricardo Carvalho Calero da Carreira do Conde

Historia

O escritor e pensador Ricardo Carvalho Calero naceu en Ferrol en 1910, mais trasladouse en 1926 a Santiago de Compostela, por cuxa Universidade foi licenciado en Dereito e en Filosofía e Letras. Membro da Real Academia Galega, tamén ostentou a Cátedra de Lingüística e Literatura Galega na Universidade de Santiago. A súa traxectoria política como galeguista e na defensa da República levouno ao cárcere, período tras o que regresou á súa cidade natal.

Cunha das máis completas e extensas traxectorias vitais en defensa da cultura galega, converteuse nun dos persoeiros fundamentais no campo da literatura e a lingua galegas. No seu labor literario destaca fundamentalmente como poeta, constituíndo todo un referente para a xeración de poetas dos anos oitenta do século pasado, década na que publica obras destacadas como Pretérito Imperfeito, Futuro condicional, Cantigas de Amigo e Outros Poemas ou Reticências. Como narrador obtivo o Premio da Crítica pola súa novela Scórpio, considerada por moitos como a mellor escrita en galego. Tamén escribe varias pezas dramáticas recollidas no seu Teatro Completo, e posúe unha extensa produción como crítico.

Mais a relevancia da súa figura transcende o eido da produción literaria, destacando o seu compromiso pola defensa da lingua e a literatura propias a través dos seus estudos e o seu posicionamento reintegracionista, feito este que lle custaría ser marxinado nos últimos anos da súa vida. Entre os seus méritos atópase ser cofundador da Editorial Galaxia, onde publica a primeira obra narrativa en galego na posguerra, A Gente da Barreira.

Ricardo Cavalho Calero foi unha figura clave para entender a investigación lingüística e literaria galega. A súa Gramática Elemental del Gallego Común superou todas as precedentes e actualizou con rigor científico o estudo da lingua, e a súa monumental Historia da Literatura Galega Contemporánea constitúe por vez primeira un esforzo de investigación da nosa literatura actual, unha interpretación crítica dos escritores que dende Rosalía a Cunqueiro cubriron un proceso fundamental na historia das nosas letras contemporáneas.