Parque das Ciencias Isidro Parga Pondal

Historia

Este parque ocupa o espazo situado tras a Capela de San Roque, dedicada a un dos santos máis populares da cidade, tanto que, o 16 de agosto é festivo local en Compostela. Nesta capela celébrase unha misa solemne conmemorando o voto que a cidade rende ao santo, nunha tradición que comezou no 1517.

San Roque de Montpellier adquiriu fama de santidade por peregrinar piadosamente por toda Italia curando aos afectados pola peste cara o ano 1379. Cando a comezos do século XVI esta enfermidade asolou a cidade, o Cabido e os rexedores de Santiago decidiron levantar na entrada da cidade polo Camiño Inglés unha capela a este santo, para que así frease a chegada da epidemia, xunto cun pequeno hospital fundado en 1578.

Esta pequena construción situada no alto da rúa das Rodas, foi transformada na segunda metade do século XVIII cando foi reformada, dotándoa dun hospital con fins asistenciais, especialmente pensado para os doentes de peste. O edificio estrutúrase en torno a unha planta rectangular e un claustro. En canto á nova igrexa, tamén de planta rectangular, está construída seguindo o estilo do barroco compostelán.

Na actualidade, o antigo hospital é un edificio administrativo da Xunta de Galicia, onde se sitúan diferentes entidades públicas de carácter científico e cultural, mentres que o seu pequeno xardín conservouse como espazo público municipal.