Parque de Belvís

Actuacións

As tarefas para a transformación do antigo espazo de hortas e agros nun novo pulmón verde para a cidade comezou co parcelario de 1992, cando o Pleno da Corporación Municipal acorda expropiar 29.138 m2 de terreos agrícolas, dedicados á labranza e prado.

En xuño de 1997 realízase o proxecto de acondicionamento provisional, organizando a área entre a rúa das Trompas e a Porta do Camiño en diferentes zonas:

- Área de xogos infantís: situada detrás da Praza do Matadoiro.

- Área de repouso: na pradería entre a rúa de Belvís e o rego Cancelón. Orixinalmente, tiña proxectada a inclusión dunha pista de fútbol na posición que hoxe ocupa o aparcadoiro, e un aparcadoiro na zona que hoxe ocupa o campo de fútbol.

- Área das hortas: preto da rúa de Belvís, na parte superior do espazo do parque.

Entre 2000 e 2001 tivo lugar a execución do proxecto de Fernando Martínez Sanadeses para a limpeza e acondicionamento do resto do espazo, con diversas obras de limpeza, demolicións, movemento de terras e plantacións de arborado, buscando solucións para os problemas de erosión provocadas pola pendente pronunciada dos terreos.

A comezos de 2004 elaborouse o Plan Especial do Parque de Belvís co obxectivo de preservar a súa singularidade paisaxística e patrimonial. Durante estes anos terán lugar diferentes traballos de limpeza e acondicionamento do espazo, como foron o proxecto de urbanización SUNP-9 de César Portela, a mellora da rede de recollida de augas pluviais, o acondicionamento dos camiños con xabre de Porriño ou a plantación do labirinto de camelias.

No acondicionamento tómase como premisa a adecuación á contorna, dando un tratamento que supoña alterar o menos posible a superficie e os elementos arquitectónicos existentes. Procurábase crear un espazo o máis funcional e polivalente posible, deseñando distintas zonas para actividades variadas: espazos lúdicos, áreas estanciais e de repouso, paseos con vistas panorámicas, zonas deportivas e aparcadoiro controlado.

Respéctanse as masas existentes formadas por arbustivas e arborado, incorporando novas plantacións en puntos concretos do parque. Provese igualmente de superficies encespadas, empregando para isto especies rústicas, adaptadas a zonas de sol e con boa resistencia ás pisadas e á seca. Consérvanse as estruturas de pedra preexistentes e o trazado dos camiños, que intentan emendar os problemas asociados ao desnivel do terreo e dótanse os paseos con bancos, papeleiras, alumeado, fontes de auga potable...

Un proxecto non realizado para este espazo foi o Parque de Europa de Kleihues. Ademais do Polideportivo de San Clemente, o prestixioso arquitecto alemán Josef Paul Kleihues (1933-2004), tamén elaborou un proxecto para o Parque de Belvís, que se combinaba co deseño de dous edificios botánicos por parte de John Hejduk, que na actualidade podemos contemplar na Cidade da Cultura de Galicia, no monte Gaiás. O Parque de Europa consistía no deseño dun mapa verde europeo, con 42 xardíns alusivos á diversidade da nova Europa unida polo Camiño de Santiago.