Paseo da Ferradura da Alameda

Historia

Os traballos desenvolvidos para crear este paseo e para comunicalo coas zonas inmediatas prolongáronse durante décadas. O proxecto que enmarca toda a intervención é de 1831, do arquitecto Blas Galiano. Estaba xa organizado en varios tramos, un deles especificamente deseñado para o tempo de inverno, con pouca vexetación que tapase o sol.

En 1835 comezou o desmonte da aba do outeiro de Santa Susana pero non será até mediados dese século que concluiría unha parte da obra; foi baixo o pulo económico e liderado do marqués de Bóveda, por iso ese tramo do paseo leva o seu nome.

Esta obra foi determinante na vida e economía urbana daquel tempo, pois deu traballo e xornal a moitos veciños da cidade e das aldeas da contorna que caeran na pobreza na crise agraria dos anos 1852 ao 1855, sobre todo naquel dificilísimo ano 1853, alcumado para sempre como o ano da fame. O Concello deseñou un programa de obras públicas que foi apoiado polos próceres da cidade.

O paseo das Boas Vistas comezou a tomar forma na década de 1870, conformando o que hoxe chamamos paseo de Bóveda e paseo das Letras Galegas. Anos despois virían os camiños que abren esa zona cara ao Campo do Gaio e máis tarde o que pecha o circuíto e chega até a igrexa do Pilar.

É un lugar moi frecuentado pola veciñanza, tanto para pasear como para facer deporte; e tamén polos visitantes que poden desfrutar de panoramas singulares sobre a cidade. Máis alá das vistas o paseo é un pequeno xardín botánico, pois foi enriquecido con todo tipo de especies vexetais locais e, sobre todo, exóticas nun conxunto que destaca pola súa harmonía.