Porta de Música de Bonaval

Historia

A escultura da Porta de Música foi inaugurada xunto co parque o 24 de xullo de 1994, como lembra a placa de bronce existente nesa plataforma vexetal, colocada preto as escaleiras de pedra que baixan cara ao castiñeiro da antiga horta do convento. Esta escultura estase a converter nun símbolo do parque.

Eduardo Chillida Juantegui (San Sabastián 1924 - San Sebastián 2002) comezou a carreira de Arquitectura en Madrid, mais decidiu abandonar os estudos para debuxar no Círculo de Belas Artes de Madrid, onde realiza as súas primeiras pezas. A súa carreira despega cando se traslada a París e realiza as súas primeiras esculturas en xeso, impresionado pola escultura grega arcaica do Louvre. En 1951 regresa definitivamente a San Sebastián, onde comeza a traballar na fragua de Manuel Illarramendi, en Hernani (Gipuzkoa). Alí realiza a súa primeira peza en ferro, Ilarik.

A obra de Chillida caracterízase pola súa introdución nos espazos abertos, formando parte deles. As súas esculturas saen do seu encerro nos museos para situarse na rúa, como El Peine de los Vientos, que se abre ao mar de San Sebastián; a Puerta de la Libertad, do barrio gótico de Barcelona; e a que talvez sexa a súa obra máis emblemática, Gure Aitaren Etxea, en Gernika.