Porta dos Leóns da Alameda

Historia

A porta, conformada por estes dous enormes piares, estaba situada fronte á porta Faxeira e foi concibida para embelecer a Alameda que estaba nacendo como espazo urbano de socialización e lecer nas primeiras décadas do século XIX. Todo o recinto -que era máis pequeno e deixaba fóra a carballeira e o outeiro de Santa Susana- quedaba pechado por unha gran reixa de ferro e por unha serie de reixas de forxa, como aínda se ve na zona da avenida de Xoán Carlos I.

En 1885 comezaron os traballos de acondicionamento da aba do outeiro de Santa Susana e a creación do que hoxe chamamos paseo da Ferradura. Foi unha das intervencións que renovaron a Alameda e contribuíron notablemente a configurar a súa aparencia actual. Daquela os leóns pasaron a este emprazamento e deron nome a un treito do paseo.