Quiosco da música da Alameda

Historia

A música, na forma dos concertos da Banda Municipal, da do Rexemento de Infantaría Zamora ou doutras agrupacións completou desde o século XIX tanto os paseos como as celebracións que tiñan lugar na Alameda; era especialmente apreciada como acompañamento do paseo e por iso até ben entrado o século XX o programa diario das actuacións era publicitado na prensa.

Este palco é -como outros moitos montados nos concellos galegos no século XIX e principios do XX- proba da querenza do público pola música, sobre todo nas xornadas de festa e é tamén indicador da multitude de agrupacións musicais que xurdiron desde finais do XIX e que están no berce dalgunhas aínda hoxe existentes. Este é o caso da Banda do Hospicio de Santiago (1849) que é o xermolo da agrupación municipal e é unha das máis antigas de Galicia.