Terrazas floridas da Carreira do Conde

Historia

A parte final da rúa de Carreira do Conde foi ampliada nas obras de 1989, cando a brigada municipal mellorou o estado da zona no seu contacto coa rúa da Senra. Neste punto orixinábanse numerosos atascos a causa do estreitamento dos carrís de circulación en dirección á Senra, que provocaban queixas por parte dos condutores a causa da complicación do tráfico. O departamento municipal decidiu ampliar este treito da Carreira do Conde e afastar o tráfico da beirarrúa, favorecendo aos peóns, ampliando o espazo de tránsito peonil.

A mediados dos anos 80 do século pasado planeouse a construción dun aparcadoiro subterráneo similar aos das prazas de Galicia e de Vigo, que trataría de solucionar o problema do estacionamento en dobre fila e a necesidade de contar con máis zonas de aparcamento no Ensanche. Este proxecto na Carreira do Conde falábase xa na época de López Carballo, alcalde de Santiago de 1964 a 1974. A parte subterránea da avenida Xoán Carlos I tiña grandes posibilidades para un posible aparcadoiro de vehículos, aproveitando o gran desnivel existente entre o Paseo da Alameda e a Carreira do Conde. A elaboración deste proxecto esixiría a realización dunha importante obra de desmonte no noiro e o corte desta avenida, cunha importante densidade do tráfico, o que orixinaría moitos problemas de circulación en toda a cidade, polo que finalmente o proxecto de aparcadoiro na Carreira do Conde foi descartado, para ser construído en San Clemente.