Vivenda modernista en Tras do Pilar

Historia

É unha vivenda unifamiliar, con solucións enxeñosas para salvar o desnivel do terreo, sendo os elementos decorativos e os contrastes das formas as que dan equilibrio e sensación de simetría ao conxunto. É a obra que inicia o modernismo na cidade, marcando unha pauta que o mesmo arquitecto seguirá noutros proxectos como son o do predio do Espiño.

Este estilo novo acomodouse moi ben aos novos conceptos de vivenda, vinculados á burguesía urbana, que quere fogares máis amplos e luminosos, con espazos para a convivencia ou a intimidade, xardíns etc., por iso foron máis frecuentes nos incipientes barrios extramuros como o Hórreo, Carreira do Conde, o Pombal ou Castrón Douro.